Nagpasalamat si kanhi Senate President og karon Chief Presidential Legal Counsel Juan Ponce Enrile sa hingpit nga pagpawalay-sala kaniya sa kasong plunder.
Sa pakighinabi kang Enrile human ang promulgation kaganihang buntag (Oct.4), gibutyag ni Enrile nga dako ang ang iyang pagtuo nga mapawalay-sala usab siya sa maong kaso tungod gihimo sa iyang legal team ang tanan sa ilang makaya.
Nagpasalamat usab si Enrile sa mga mahistrado tungod sa matod pa paghatag og hustisya kaniya og sa mga kaubang akusado.
Samtang, mibuwelta usab ang kanhi Senate President sa mga nagpasang-at og kasong graft batok kaniya.
Uktobre 4, 2024 sa buntag gipawalay-sala sa Sandiganbayan Third Division si Enrile kauban ang kanhi niya chief of staff nga si Gigi Reyes og ang gikonsidera nga Pork Barrel Queen nga si Janet Lim Napoles.
Nagpasalamat usab si Napoles sa tanang nag-ampo hangtod sa mugawas ang maong desisyon.
Bisag bag-ong kalamposan kini sa kampo ni Napoles, padayon gihapon niya nga isilbi ang mga nauna nga conviction sa korte batok kaniya kalabotan gihapon sa Priority Development Assistance Fund (PDAF) sa mga magbabalaud.
