Nakadawat ug pagdayeg ang embahada sa Pilipinas sa Israel gikan sa Filipino community tungod sa paspas nga aksyon niini sa panagbangi tali sa Iran ug Israel.
Sa Facebook post sa Department of Migrant Workers (DMW) niadtong Sabado, Hunyo 28, gipaabot ni Winston Santos ang iyang pasalamat ug pagsaludo sa embahada.
Gipangunahan kini ni Ambassador Aileen Mendiola kauban si Consul General Anthony Mandap ug DMW-Migrant Workers Office Attaché Rodolfo Gabasan
Lakip sa mga hinabang nga ilang gihatag mao ang medikal nga pag-atiman sa mga nasamdan nga mga Pilipino, emerhensya nga relokasyon sa mga naapektuhan sa pagpamomba, ug pagpauli sa mga 26 ka mga Pilipino.
Dugang pa, ang matag Filipino sa Israel makadawat usab og $200 isip financial assistance ug psychological support services gikan sa nabansay nga mental health professional.
Kahinumdoman nga nagsugod ang tensyon sa Middle East human ang Israel nilusad og dakong pag-atake sa Iran niadtong Hunyo 13. Tungod niini, mibalos ang Iran og airstrike sa Israel.
