GENERAL SANTOS CITY – Gustong maniguro ni Pangulong Rodrigo Duterte nga mahuman ang problema sa gobyerno batok sa puwersa sa ISIS-linked Maute terror group sa Mindanao partikular sa Marawi City.
Kini ang gihimong pagdepensa ni Presidential Communications Office Secretary Martin Andanar sa hangyo ni Pangulong Duterte sa Kongreso nga patas-an sa lima ka bulan ang pagpatuman sa Martial Law sa tibuok Mindanao.
Kagahapon dihang nahidangat sa dakbayan si Andanar kon asa iyang pagpamulong gibutyag niini nga sayon lang sa gobyerno ang ipahigayong rehabilitasyon sa Marawi ilawom sa pagpatuman sa balaud militar hinungdan nga buot sa Punong ehekutibo nga lugwayan hangtud sa katapusan sa tuig.
Nagtuo si Andanar nga dawat sa Maguindanaons ang martial law tungod nasayod kon unsa ang tinuod nga sitwasyon sa gikonsiderang ‘land of promise’.
Matud ni Andanar nga dawat sa Malakanyang nga dili tanan ang nalipay sa deklarasyon sa balaud militar. Nagtuo ang opisyal nga makab-ot ang potensiyal sa Mindanao kon patas-an pa ang Martial law.
Dili matud pa muondang si pangulong Duterte kon dili hingpit nga makab-ot ang kalinaw sa Mindanao.
