GENERAL SANTOS CITY – Magparyentehanay ang biktima nga si Po3 Lloyd Platon ug ang suspek nga si Po1 Virgil Rivera, sa natigayong pagpamusil sa M’lang, North Cotabato, miaging gabii.
Kini ang gibutyag ni Police Inspector Jorlito Patrona, OIC chief sa M’lang Municipal Hospital, sa pakighinabi sa Bombo Radyo Gensan.
Sumala pa nga ang duruha ang pulos taga-M’lang, apan si Po3 Platon ang nadestino sa T’boli Municipal Police Station, samtang si Po1 Rivera ang sa RPSB-11.
Sa imbestigasyon, nag-inum matud pa ang grupo ni PO1 Rivera nga gilangkuban sa iyang igsuon nga usa ka sundalo, ig-agaw nga usa ka pulis, usa ka Wendell Papna ug usa ka babaye sa usa ka barbekyuhan Brgy Poblacion A, M’lang.
Gikan matud pa ang grupo sa gitambungan nga haya. Samtang anaa na sa barbekyuhan, mi-order matud pa sila ug pulutan, apan gikabutyag nga dili available, hinungdan nga miadto sa mga baligya aron tan-awon unsa ang pwedeng pili-on.
Atua usab nagbarog ang biktima nga si Po3 Platon nga gituuhang may gihulat usab nga order.
Namatikdan matud pa ni Po1 Rivera ang nakasukbit nga pusil ni Po3 Platon, hinungdan nga gipangutana kon usa kini ka pulis.
Apan misangko kini sa lalisanay, kung asa dihang nagkainitay na, giulang ni Wendell Tapna, gumikan nasayod kini nga magparyente ang duruha.
Apan ulahi na gumikan nakapabuto na ug pusil si Po1 Rivera ug natumba si Po3 Platon, lakip si Tapna nga naigo usab.
Kahibaluan nga narekober sa crime scene ang mga basyo sa bala sa 9mm pistol.
Gilayon matud pang misibat ang grupo ni Po1 Rivera dala ang pusil ni Po3 Platon human kini nahagbong pagkahagba sa biktima.
Samtang human sa gipahigayong hot pursuit operation, gi-surrender matud pa sa amahan ni Po1 Rivera ang naasoy’ng pusil, kung asa ginasuta kini karon nakapabuto usab.
Kahibaluan nga nakaangkon ug duha ka samad-pinusilan ang biktima sa likod, nga maoy hinungdan sa iyang kamatayon.
Sa karon nagpadayon ang hot pursuit operation sa kapulisan aron matultulan ang suspek nga si Po1 Rivera, nga nagpabiling gawasnon.
Ginahikay na usab sa kapulisan ang mga dokumento aron mapasakaan ug kaso ang suspek.
