Gipasalig ni DPWH Secretary Vince Dizon nga higpit nilang gisusi ang matag reklamo nga moabot sa ilang buhatan, ilabi na ang may kalambigitan sa flood control projects.
Kini isip tubag sa mga isyu nga gipatungha sa Isumbong Mo Sa Pangulo website, diin daghang mga lungsuranon ang nagpahayag sa ilang mga mulo ug obserbasyon kalabot sa mga proyekto sa gobyerno.
Gihingusgan ni Dizon nga ang iyang departamento dili basta-basta ibaliwala kini nga mga reklamo ug sila nagsunod sa usa ka proseso aron masiguro nga kini masusi ug maaksiyonan.
Sa interpelasyon atubangan sa House Committee on Appropriations, diin si Kongresista Romeo Momo nagsilbi nga vice-chair, gipangutana niini si Secretary Dizon kon unsaon pagsiguro sa DPWH nga lehitimo ang mga reklamo nga ilang madawat ug dili kay hinimo-himo lang o politiko.
Si Kongresista Momo nipadayag sa iyang kabalaka nga isip mga politiko, aduna silay mga kaatbang nga mahimong mogamit sa maong mga isyu sa pagpakaulaw o pagpaubos niini.
Busa, importante nga masayran kung giunsa pagrepaso sa DPWH kining mga reklamo aron maseguro nga dili sila mabiktima sa mga malisyosong taho.
Matod ni Secretary Dizon, ang ilang nag-unang kriterya sa pagtubag sa mga reklamo nga nadawat mao ang kon makonsidera ba nga “ghost project” ang maong proyekto, buot ipasabot nga wala kini tinuod o wala pa mahuman.
