Kusog gihapon ang suporta sa impeachment ni Bise Presidente Sara Duterte, bisan sa mga magbabalaod gikan sa Mindanao ug Visayas, ang nailhang mga kuta sa pamilyang Duterte.
Kini ang gipahibalo ni House prosecutor ug Bicol Saro Party-list Rep. Terry Ridon.
Sumala ni Ridon, kinsa mao usab ang chairman sa House Committee on Public Accounts, ang daghang boto sa House nagpamatuod nga ang suporta sa impeachment gikan sa lain-laing partido sa politika, rehiyon, ug mga alyansa.
Anaa sa 257 ka magbabalaod ang mibotar pabor sa pag-aproba sa Articles of Impeachment batok kang VP Duterte.
Base sa official record sa House, sa Visayas – 43 sa 50 ka magbabalaod ang mibotar pabor sa impeachment. Mindanao: 41 sa 61 ka kongresista ang miuyon usab. Luzon: 125 sa 142 ka representante ang nagpakita og suporta.
Tungod niini, sumala sa Kongresista, ang mga pasangil nga ang impeachment gidasig lamang sa interes sa Luzon o ang gitawag nga “Imperial Manila”.
Gireklamo si VP Sara tungod sa giingong sayop nga paggamit sa P612.5 milyon nga confidential funds, mga tinago nga bahandi, bribery, ug mga hulga sa kinabuhi ni Presidente Ferdinand R. Marcos Jr., Unang Ginang Liza Araneta-Marcos, ug kanhi Speaker Ferdinand Martin G. Romualdez.
Gipanghimakak usab sa Bise Presidente ang mga akusasyon ug miingon nga kini walay basehan ug pamolitika lang.
Ang Articles of Impeachment gisumite na sa Senado nga gilauman nga mag-abli isip Impeachment Court karong Lunes, Mayo 18, sama sa gisaad ni Senate President Alan Peter Cayetano.
Giingon ni Ridon nga ang tibuok 11-ka-miyembro nga House prosecution panel motambong sa pag-abli niini sa alas 3 sa hapon alang sa pormal nga pagsugod sa husay.
