GENERAL SANTOS CITY – Walay koordinasyon sa kapulisan ang gipahigayong reggae night sa Dolores Tropicana Beach Resort sa Brgy. Tambler ning syudad.
Kini ang pagpaklaro ni P/Major Ananias Vasquez , hepe sa Tambler Police Station sa pakighinabi kaniya sa Bombo Radyo may kalabutan sa natigayong kagubot sa maong kaliguanan sa miaging Sabado sa gabii.
Matud ni Vasquez, usa ka concern citizen ang mitawag sa ilang estasyon kalabut sa komosyon nga nahitabo hinungdan nga gilayong giadtuan sa ilang patrol team.
Dili na kaayo kaayo grabe ang kasamok nga natigayon og naundang na ang paglabayanay ug lingkuranan og mga botelya sa ilimnong makahubog sa dihang miabot ang mga pulis.
Gibutyag ni Vasquez nga aduna silay nadakpan nga lima katawo nga walay face mask.
Giklaro niini nga dihang nakit-an ang ilang patrol car pag-abot sa lugar, nag-iyahay sa pagdagan sa lain lain nga direksyon ang mga tawo nga anaa sa beach hinungdan nga dili nila kaya nga madakpan ang nalambigit sa kagubot.
Aminado kini nga wala sila masayod nga adunay concert sa maong beach resort tungod wala silay nahatag nga clearance alang sa maong aktibidad.
Sa pamahayag niini nga Standard Operating Procedure (SOP) sa estasyon nga butangan og pulis ang usa ka lugar una pa man usa ka event alang sa paghatag ug seguridad human ang gihimong koordinasyon kanila.
Ang Dolores Tropicana Beach Resort ang gipanag-iyahan sa kompaniya sa pamilya ni City Mayor Ronnel Rivera, diin, bag-uhay lamang maoy nagpagawas og Executive Order No. 13 kalabot sa istriktong pagpatuman sa anti-covid measures sa siyudad.
