Nanawagan si Department of Justice Secretary Jesus Crispin Remulla sa kampo sa napalagpot nga kongresista nga si Arnolfo Teves Jr. nga hunungon na ang makalangay nga mga taktika ug husayon na lang ang ilang mga kaso sa korte.
Matod ni Remulla, likayan ang paghimo og way basehanan nga mga pasangil batok sa gobyerno sa Pilipinas nga makadaot sa integridad sa Justice System niini.
Gihimo sa DOJ ang pamahayag human gikataho nga si Teves nangayo og tabang gikan sa United Nations, Amnesty International, human rights groups, ug kang Pope Francis.
Base sa nasangpit nga mga apela, gipahayag niini nga dili makiangayon nga gilutos ug gipasanginlan si Teves sa gobyerno sa Pilipinas.
Sumala sa DOJ, espekulasyon ug usa ka delaying tactic ang maong mga kalihukan diin sulay matud pa sa kanhi magbabalaod nga nagpakaaron-ingnon nga biktima.
Giklaro pa sa DOJ nga ang tinuod nga biktima mao ang mga indibidwal nga nakabsan sa ilang kinabuhi tungod sa mga kaso sa pagpatay nga naglambigit kang Teves.
Kahinumdoman nga gitanyagan sa gobyerno og proteksyon si Teves sa makadaghang higayon apan mibalibad siya.
