Gipasiugda sa Department of Justice nga dili makaapekto ang gipasaka nga kasong “grave threats” batok kang Vice President Sara Duterte sa “impeachment trial” sa Senado.
Sa usa ka interbyu kang Justice Spokesperson Atty. Polo Martinez, iyang gihingusgan nga lahi ang proseso sa kaso ug ang nagpadayong “impeachment proceedings.”
Matud niya, nagkalain kini nga mga proseso, matod pa ang paghukom sa Senate Impeachment Court angay makaapekto sa pagdumala sa Regional Trial Court sa kasong “grave threats” batok sa ikaduhang pangulo.
Sumala sa tagapamulong, ang “impeachment trial” sakop sa lehislatura ubos sa pagpanguna sa mga “senator judges,” samtang ang kasong kriminal sakop sa hukmanan.
Kagahapon, pormal nang gikasuhan sa DOJ si Vice President Sara Duterte og “grave threats” sa Regional Trial Court sa Quezon City.
Konektado kini sa giingong pagpanghulga sa ikaduhang pangulo sa kinabuhi nila ni President Ferdinand “Bongbong” Marcos Jr., First Lady Liza Araneta-Marcos, ug kanhiang House of Representatives Speaker Martin Romualdez.
Milabay og kapin usa ka tuig sa wala pa pormal nga gisampa sa kagawaran ang kaso sa hukmanan, human kini gi-refer sa National Bureau of Investigation o NBI niadtong 2025.
Pagpasabot ni DOJ Spokesperson Martinez, walay epekto o impluwensiya ang nagpadayong “impeachment trial” sa Senado sa pagpasaka sa kaso batok sa bise presidente.
Sa pagkakaron, naa na sa hurisdiksyon sa hukmanan ang kasong “grave threats” batok kang Vice President Sara Duterte.
Samtang, gibasura sa prosekusyon ang “inciting to sedition complaint” tungod sa kawalay igong ebidensya.
