Gikondenar ni Defense Secretary Gilberto Teodoro Jr. ang China Daily human kini nagpagawas og social media post nga naghulagway sa mga Pilipino isip mga unggoy kalabot sa isyu sa 2016 Arbitral Ruling sa West Philippine Sea (WPS).
Matud pa ni Teodoro, ang maong post nagpakita sa tinuod nga pagtan-aw sa Chinese Communist Party (CCP) ngadto sa mga Pilipino ug usa ka porma sa pagpaubos ug propaganda batok sa nasud.
Ang kontrobersyal nga post gipagawas Hulyo 10, duha ka adlaw sa wala pa ang ika-10 nga anibersaryo sa makasaysayang desisyon sa Permanent Court of Arbitration, nga nag-ila sa katungod sa Pilipinas sa iyang Exclusive Economic Zone (EEZ) sa West Philippine Sea.
Sa video, makita ang usa ka unggoy nga nagsul-ob og barong Tagalog ug salakot, samtang daw gisugo sa mga karakter nga nagrepresentar sa mga Amerikano ug Hapones.
Gipakita usab sa video ang maong unggoy nga gi-water cannon sa dagat human makadawat og kopya sa arbitral award.
Gitawag usab niya ang maong post nga “contemptible propaganda” ug giingong nagpakita kini nga walay lig-on nga basehan ang China sa pagdepensa sa ilang mga angkon sa West Philippine Sea pinaagi sa makatarunganong argumento
