Mohangyo ang Department of Migrant Workers (DMW) sa mga tag-iya sa barko nga dugangan ang presensya sa maritime security escort para sa mga barko ug dugangan ang gidaghanon ug kalidad sa mga armadong security guard sa mga barko ilabina kon moagi sa Red Sea ug Gulf of Aden.
Taliwala usab kini sa mga pag-atake sa mga rebeldeng Houthi gikan sa Yemen sa mga barko nga naglawig sa nasangpit nga kadagatan nga giklasipikar isip ‘war-like zones’.
Matod ni Department of Migrant Workers (DMW) chief Hans Leo Cacdac, ilang aksyonan ang mga tag-iya sa tulo ka mga barko diin nakompromiso ang kaluwasan sa mga Pinoy nga tripulante sa pag-atake sa mga rebeldeng Houthi.
Matud pa ni Cacdac nga ang ilang lakang alang sa pagpanalipod sa mga Filipino seafarers tungod ang Red Sea ug Gulf of Aden gitudlo nga “war-like zones” tungod sa pag-atake sa mga rebeldeng Houthi.
Mohimo usab og aksyon ang ahensya batok sa mga tag-iya sa tulo ka barko nga giatake sa rebeldeng grupo nga naglakip sa Galaxy Leader, True Confidence, ug MV Tutor.
Una nang niingon ang ahensya nga dili na nila iproseso o tugotan ang pagpasakay sa mga marinero sa tulo ka mga barko nga target sa pag-atake.
