SOUTH COTABATO – Gipasalig ni Governor Reynaldo Tamayo sa South Cotabato nga siya ‘naka-focus’ sa sitwasyon’ sa pagtino sa mga kinahanglanon nga lakang human sa landslide sa Sitio El Dulog, Barangay Ned, Lake Sebu, South Cotabato labi na sa Sto. Niño, hangtod sa Maitum Road.
Ubos sa iyang pagpangulo, ang provincial government nagpadayon sa pagpakusog sa ilang dali nga pagtubag bahin niini.
Sa usa ka eksklusibong interbyu sa Bombo Radyo Gensan, gibutyag ni Gov. Tamayo nga ang bahin sa national highway sa nahisgutang lugar dili pa gihapon maagian.
Adunay panginahanglan alang sa usa ka dinaliang diversion road aron ang kalihokan sa ekonomiya sa lugar magpadayon.
Sumala ni Gov. Tamayo, atol sa inspeksyon, nakita ang mga liki ug kadaot sa istruktura sa ibabaw sa dalan nga naghatag peligro sa mga motorista ug mga residente.
Dugang niya nga ang PDRRMO–South Cotabato diha-diha dayon nga nakig-alayon sa Department of Public Works and Highways (DPWH) ug sa Provincial Engineering Office aron pagpahigayon og teknikal nga ebalwasyon ug pagpatuman sa angay nga mga interbensyon alang sa dinaliang pagpahiuli sa luwas nga dagan sa trapiko.
Base sa padayon nga pagmonitor, ang apektadong lugar nagpadayon sa paglapad, nga nagpakita sa padayon nga paglihok sa yuta sa lugar. Tungod niini, hugot nga gitambagan ang publiko nga temporaryong likayan ang pag-agi sa nahisgutang lugar aron malikayan ang bisan unsang posibleng aksidente o insidente.
