Nihatag si Department of Education Secretary Sonny Angara sa iyang hugot nga suporta aron masulbad ang dugay nang kakulang sa classroom sa nasod pinaagi sa mas aktibong pakigtambayayong sa pribadong sektor ubos sa Public-Private Partnerships (PPP), subay sa ikaupat nga SONA speech sa presidente.
Matud ni Angara nga ang ahensya kasamtangang nakig-alayon sa mga private partners aron mapadali ang pagtukod sa bag-ong mga classroom. Dugang pa niya nga sa miaging tuig, mokabat lang sa 6,000 ka classrooms ang gitukod sa gobyerno matag tuig.
Apan ubos sa PPP model, kapin sa 100,000 ka classroom ang matukod sulod sa lima ngadto sa napulo ka tuig. Gawas sa imprastraktura, namulong usab si Angara mahitungod sa panginahanglan sa pagbag-o sa direksyon sa edukasyon aron kini mahiuyon sa mga trabaho nga mugna sa teknolohiya ug Artificial Intelligence (AI).
Lakip sa mga inisyatiba mao ang pagpatuman sa “TechPro” track para sa Senior High School, sa pakigtambayayong sa TESDA, CHED, ug DOLE, aron mahatagan ang mga kabatan-onan og dugang mga oportunidad sa trabaho sama sa graphic design ug electrical work.
