Gilunsad sa Department of Education (DepEd) ang tibuok nasud nga Oplan Balik Eskwela isip pagpangandam sa pagbukas sa School Year 2026-2027 sa Hunyo 8, 2026.
Sumala ni Education Secretary Sonny Angara, ang Oplan Balik Eskwela ipatuman gikan Hunyo 1 hangtod Hunyo 11 aron masiguro ang hapsay nga pagbukas sa mga klase sa tibuok nasud.
Ang programa nagtumong sa pagpadali sa proseso sa pagpalista, pagtubag sa mga kabalaka sa publiko, ug pagsiguro nga ang mga eskwelahan andam na alang sa bag-ong school year
Mga 16 ka ahensya sa gobyerno ug mga kauban sa utility ang moapil sa pagpangandam alang sa pagbukas sa mga klase.
Apil niini ang Department of the Interior and Local Government (DILG), Philippine National Police (PNP) ug Department of Health (DOH), nga maoy modumala sa pagpatuman sa mga lakang sa kaluwasan, panglawas, sa mga eskwelahan.
Ang Department of Transportation (DOTr) mag-focus sa dagan sa mga pasahero sa pagsugod sa klase samtang ang Department of Information and Communications Technology (DICT) ug National Telecommunications Commission (NTC) motabang sa pagpalig-on sa mga serbisyo sa komunikasyon ug koneksyon.
Ang National Disaster Risk Reduction and Management Council (NDRRMC) andam usab alang sa posibleng epekto sa dili maayong panahon ug uban pang mga emerhensya atol sa pagbukas sa klase.
Aron mapadali ang pagtubag sa mga kabalaka sa mga ginikanan ug mga estudyante, ang Oplan Balik Eskwela Public Assistance Command Center mo-operate usab pinaagi sa mga hotline, text messaging, email, ug mga social media platform gikan sa sentral, rehiyonal, division, ug hangtud school levels
Samtang, giawhag sa DepEd ang publiko nga mokooperar aron ang pagbukas sa klase karong tuiga mahimong hapsay ug luwas.
