Andam ang Department of Education (DepEd) nga makig-alayon sa Office of the Ombudsman aron mas mapadali ang hustong imbestigasyon kabahin sa maanomalosong pagpalit sa P2.4 bilyon nga kantidad sa mga laptop atol sa sa COVID-19 pandemic.
Kini human nga nagmando ang Ombudsman nga pasakaan og kasong graft ug falsification of documents si kanhi Education Secretary Leonor Briones ug uban pang mga opisyal sa ahensya.
Gikumpirma sa DepEd nga nakadawat na sila sa resolusyon gikan sa Ombudsman ug andam silang mutuman sa proseso sa kaso.
Giklaro usab sa ahensya nga wala na sa serbisyo o koneksiyon sa DepEd ang mga opisyal nga gilambigit sa maong kaso.
Nagpahayag ang DepEd sa ilang kaandam
nga mutabang pinaagi sa paghatag sa tanang kinahanglanon nga dokumento, impormasyon ug suporta, aron masiguro nga mapanagot ang mga responsable ug mapanalipdan ang interes sa publiko.
Ang kontrobersiya misugod human nga gi-audit sa Commission on Audit (COA) kaniadtong 2022 ang pagpalit sa mga laptop nga giingong outdated ug sobra ang presyo nga nagkantidad og P53,000 ang matag usa alang sa mga public school teachers, panahon sa distance learning nga gisugdan tungod sa pagdili sa face-to-face classes atol sa pandemya.
Nanghinaut ang DepEd nga pinaagi sa ligdong nga proseso, mahatagan ug hustisya ang publiko ug malikayan ang susamang panghitabo sa umaabot.
