Target karon sa Department of Agriculture (DA) nga makaani og 20.4 milyones metriko toneladang bugas karong tuiga, mas taas og 400,000 metriko tonelada kumpara sa 2023.
Matud ni DA Assistant Secretary for Special Concerns and for Official Development Assistance ug Spokesperson Arnel De Mesa, positibo ang ilang ahensya nga makab-ot ang maong target tungod sa gipaabot nga mas maayong panahon sa atong nasud.
Dugang niini mao ang ilang nagpadayon nga mga programa ug giplanohang mga kalihokan aron matabangan ang ilang departamento nga makab-ot ang target nga ani karong tuiga.
Matod niya positibo usab ang panglantaw ni Agriculture Secretary Francisco Tiu Laurel Jr. nga moabot sa 20.4 milyones metriko tonelada bisan sa toneladang bugas humay nga nahibilin sa mga bodega sa National Food Authority (NFA).
Samtang, si De Mesa niingon nga ang budget nga ilang padayon nga gipang-apod-apod ngadto sa mga mag-uuma igo na aron makaabot sa maong lebel sa ani karong tuiga.
Matod niya nga mas taas ang budget nga gihatag sa mga lokal nga mag-uuma gikan sa National Rice Program aron mamintinar ang abunda nga ani sa nasud.
Dugang pa sa tigpamaba nga sugdan usab karong tuiga ang pagpatuman sa giusab nga Rice Tarrification Law, diin ang budget allocation nga nadawat sa Rice Competitiveness Enhancement Fund (RCEF) ni-triple gikan sa P10 bilyones ngadto sa P30 bilyones ka pesos.
