Giprayoridad sa Department of Education (DepEd) ang pagdugang og security guards sa dagkong mga eskwelahan isip usa sa mga lakang aron matubag ang isyu sa seguridad ug kapintasan sulod sa mga kampus.
Sumala ni DepEd Secretary Sonny Angara, apil sa gisugyot nga mga lakang sa ahensya ang pagdugang og security personnel, apan dili pa igo ang pondo aron matag eskwelahan sa nasud mahatagan og kaugalingong guwardiya.
Matud ni Angara, sugdan una ang pagbutang og dugang seguridad sa dagkong eskwelahan tungod kay base sa ilang obserbasyon, kasagarang mahitabo ang mga insidente sa mga campus nga adunay kapin 1,000 hangtod 1,500 ka estudyante.
Gawas sa dugang nga security guards, giingon usab sa kalihim nga posible nga makigtambayayong ang DepEd sa mga barangay tanod ug magbutang og mga metal detector sa pipila ka eskwelahan isip dugang nga lakang sa pagpanalipod sa mga estudyante ug personnel.
