Gisiguro sa Department of Agriculture (DA) nga adunay igo nga supply sa abono ang nasud para sa sektor sa agrikultura, bisan pa man sa nagkagrabeng kagubot tali sa Israel ug Iran nga posibleng makaapekto sa shipping sa Gulf region, diin nahimutang ang Qatar, usa sa mga nag-unang supplier sa abono sa Pilipinas.
Matod ni DA Secretary Francisco Tiu Laurel Jr., aduna pay stock ang Pilipinas nga molungtad hangtod sa kataposan sa tuig.
Gibutyag usab niini nga adunay alternatibong mga supplier sa abono ang nasud, sama sa Russia ug Brunei Darussalam, maong gilauman nga dili magkulang ang supply.
Dugang pa sa kalihim, wala usab gipaabot ang dakong pagsaka sa presyo sa mga agricultural products, bisan pa man nga posibleng adunay gamay nga epekto sa pagsaka sa presyo sa petrolyo.
