Giimbestigahan na sa National Bureau of Investigation ug Philippine National Police ang posibilidad nga “staged” o adunay sabwatan nga nahitabo sa insidente sulod sa Senado.
Midumili ang NBI sa pagkumpirma sa maong spekulasyon ug giingon nga kabahin pa kini sa padayon nga imbestigasyon.
Sumala kang NBI Director Melvin Matibag, nakatutok ang ilang pagsusi sa mga factual evidence samtang nakigtambayayong ang PNP sa pag-imbestiga sa 20 ka personalidad nga anaa sa lugar. Gisusi karon sa mga awtoridad ang mga CCTV footage ug mga basyo sa bala nga narekober.
Gipasiugda ni Matibag nga dili pa sila makahatag og bisan unsang konklusyon samtang nagpadayon ang imbestigasyon, apan iyang gipasalig nga ipahibalo sa publiko ang resulta sa higayon nga mahuman kini.
Gikumpirma usab ni PNP Chief Lt. Gen. Nartatez Jr. nga ang NBI ang nanguna sa maong imbestigasyon.
Sa karon, gitino na sa mga awtoridad ang mga tawo nga adunay bitbit nga armas ug ang mga nakatalaga nga security forces sulod sa Senado.
Kauban sa gina-accounting ang mga personnel gikan sa Office of the Sergeant-at-Arms (OSAA) Security, Police Security and Protection Group (PSPG), ug Armed Forces of the Philippines (AFP), ilabi na ang mga miyembro sa Philippine Marines.
Sumala kang Nartatez, mga 20 ka indibidwal na ang natino ug na-interview na nila ang OSAA ug NBI.
Itandi sa mga imbestigador ang mga pahayag sa mga saksi sa pisikal nga ebidensya nga nakuha, lakip ang mga basyo sa bala ug mga CCTV footage sa lugar.
