GENERAL SANTOS CITY – Gikatakdang kasuhan ug grave coercion ug pagsupak sa Republic Act 9995 o Anti Photo and Video Voyeurism Act in relation to Cybercrime Prevention Act ang usa ka criminology graduate gumikan sa reklamong sextortion.
Kini human ang gihimong entrapment operation sa Regional Anti-Cybercrime Unit 12, kung asa ang suspek giilang si Dan Amerson Mastura nga gikabutyag nga misulay ug sextortion ang reklamante nga usa ka 19-anyos nga dalaga.
Gipahigayon ang entrapment sa usa ka lodging house sa Barangay Dadiangas East kaniadtong Martes.
Base sa imbestigasyon sa RACU 12, usa ka kaila matud pa sa suspek ang naghatag kaniya ug mga litrato sa biktima.
Nakig-chat matud pa ang suspek ug nagbahad nga ipakatag ang mga litrato kon dili makighilawas kaniya.
Hinungdan nga midangop sa Anti-Cybercrime Unit sa kapulisan ang biktima ug gilusad ang entrapment operation.
