GENSAN- Nagpahayag si Congresswoman Shirlyn Bañas-Nograles sa Lone District of Gensan sa iyang suporta sa plano sa Sangguniang Panlungsod (SP) sa General Santos City nga imbistigahan ang Mabuhay Underpass, usa ka multi-million peso infrastructure project nga hangtod karon wala pa mahuman.
Apan, natingala ang kongresista nga karun ra naglihok ang konseho aron masayran ang tinuod nga kahimtang niini, nga kapin na sa tulo ka tuig ang pagkadelatar, bisan pa nga duha ka tuig lang unta ang target completion niini.
Gibutyag ni Bañas nga hinay ang progreso sa maong underpass, ug angayang dugay na untang nagpahigayon og coordination meeting ang lokal nga panggamhanan sa syudad aron tukion ang mga problema nga nakapahinay sa proyekto.
Dugang pa niya, dili siya ang nanguna sa pagpatuman sa maong proyekto, apan iyang giila ang responsibilidad nga bantayan kini tungod sa kadakong pondo ang gigahin.
Gilauman nga pinaagi sa imbestigasyon sa SP, masabtan sa publiko ang tinuod nga estado sa proyekto ug masolusyunan ang dugay na nga pagkadelatar sa implementasyon niini.
