GENSAN – Dili makakuha og prangkisa ang mga tricycle operator sa dakbayan kon aduna pa silay wala mabayrang citation tickets o traffic violations.
Sumala ni Atty. Jong Gonzales, hepe sa Public Safety Office, mao kini ang usa sa mga nag-unang hinungdan nganong daghan sa mga operator ang nalisdan sa paglukat o pag-renew sa ilang prangkisa.
Bisan pa og 100 pesos lamang ang bayranan sa prangkisa, nagapatong-patong ang ilang mga multa tungod sa karaan nga paglapas sa traffic rules, hinungdan nga modako ang ilang kinatibuk-ang obligasyon.
Gipasabot ni Gonzales nga tungod kay computerized na ang sistema sa City Treasurer’s Office, dali na nga makita ang tanang unpaid penalties sa higayon nga mokuha ang usa ka driver og cedula o bisan unsang opisyal nga dokumento sa dakbayan.
Tungod niini, dili na matabunan o malusutan ang mga karaang violation nga wala pa mabayran
Giklaro usab sa opisyal nga ang mga multa dili kabahin sa bayad sa prangkisa.
Ang prangkisa lahi nga bayranan, samtang ang multa silot sa paglapas sa mga balaod sa trapiko.
Busa giawhag ang mga operator nga ayohon ug bayran sa hustong panahon ang ilang mga obligasyon aron malikayan ang dugang nga problema sa pagproseso sa ilang mga dokumento sa umaabot.
