Nasikop sa Criminal Investigation and Detection Group (CIDG) ang usa sa mga kakunsabo nilang kanhi presidential spokesperson Harry Roque og Cassandra Ong sa kasong qualified trafficking in persons, sa usa ka operasyon sa Mabalacat City, Pampanga.
Sa pahayag sa CIDG, giila ang suspek isip si “Marlon” nga nasikop sa usa ka entrapment operation sa Brgy. Tabun niadtong Mayo 22.
Si Marlon matod pa ang operations officer sa security agency nga aktibong nag-operate niadtong natigayon ang trafficking sa Lucky South 99 Outsourcing Inc., usa ka Philippine offshore gaming operator (POGO) sa Porac.
Gawas sa bag-ong pagkaaresto, adunay natanggong usab nga warrant of arrest si Marlon para sa 10 ihap sa qualified trafficking in persons gikan sa Regional Trial Court Branch 118 sa Angeles City.
Walay girekomendang piyansa para sa iyang kaso.
Matod kang CIDG chief Police Major General Nicolas Torre III, pamatuod kini nga walay undang ang ilang paningkamot nga gukdon og ipapriso ang mga wanted nga nalambigit sa grabeng krimen, para sa hustisya sa mga biktima.
Giawhag usab sa opisyal ang nahibiling 50 co-accused nga magsurender na kung asa nagpadayon usab ang paggukod sa ilang Tracker Teams.
Si Roque og uban pa ang adunay natanggong nga warrant of arrest kalabotan sa mga ilegal nga aktibidad sa sulod sa Lucky South 99 POGO hub.
Gi-isyu usab ang mga warrant sa parehong korte sa Angeles City.
Hugtanong gipanghimakak ni Roque ang akusasyon, og gihingusgan nga wala siya nahimong legal counsel sa unsa mang ilegal nga POGO, lakip ang Lucky South 99.
Sa iyang pamahayag nga giubanan lamang niya si Ong sa usa ka meeting tungod nagtuo siya nga biktima kini sa estafa.
Sa kasamtangan, nagapangayo si Roque og asylum sa Netherlands.
