GENSAN- Gipadayag ni Dr. Ricardo Rodaje, medico legal officer sa National Bureau of Investigation (NBI-SARDO), nga nagpadayon pa ang paghulat sa opisyal nga resulta sa histopathological examination nga gipadala sa Maynila kabahin sa pagkamatay sa OFW sa Dammam, Saudi Arabia nga si Queen Jo Lacrita, ug posibleng moabot og usa hangtod duha ka bulan ang pagpagawas niini tungod sa kadaghan sa ginaproseso nga samples, apan iyang giingon nga iyang sundon ug i-follow up aron mapaspasan kini ug mahatagan og kahupayan ang pamilya.
Matod pa niya, base sa ilang initial nga obserbasyon, ang mga nakita nga marka sa lawas sa biktima dili pasa, kundili resulta sa post-mortem changes o mga kausaban sa lawas human sa kamatayon, ilabi na kung kini gi-freeze ug gi-defrost.
Kini mahimong hinungdan sa superficial skin desquamation nga mura’g pasa tan-awon apan dili tinuod nga kadaot samtang buhi pa ang pasyente.
Nadiskubrehan usab ang presensya sa mga needle marks nga nagpakita nga siya gitambalan og medikal nga paagi.
Gipasabot usab ni Dr. Rodaje nga sa karon wala silay nakitang ebidensya sa foul play base sa external examination, ug matod pa niya, sa Dammam Hospital pa lang unta nakita na kini kung adunay dautang nahitabo, samtang giatiman ang biktima tungod sa grabe nga “lumbar pain” o kasakit sa likod nga hinungdan nga dili na siya makalingkod o makatindog, ug kini usab ang gi-basehan sa ilang giingong cause of death samtang nagpaabot pa sa pinal nga resulta sa eksaminasyon.
