Nagtudlo ang International Criminal Court (ICC) kang Judge Joanna Korner isip presiding judge sa Trial Chamber III nga modumala sa kasong krimen batok sa katawhan batok kang kanhi Presidente Rodrigo Duterte kalabot sa iyang kampanya batok sa ilegal nga droga.
Sa usa ka dokumento nga gipetsahan Abril 29, gikumpirma sa ICC Trial Chamber III nga si Korner napili nga mangulo sa tulo ka huwes nga panel. Ang desisyon gihimo pipila ka adlaw human ang ICC Presidency nagporma sa trial chamber niadtong Abril 24.
Ang Trial Chamber III gilangkoban nila ni Korner, Judge Keebong Paek, ug Judge Nicolas Guillou, ug pormal nga giporma niadtong Abril 24 sa ICC Presidency aron maminaw sa kaso batok sa kanhi presidente. Si Judge Korner usa ka beterano nga British judge nga adunay kapin sa 45 ka tuig nga kasinatian sa natad sa balaod kriminal.
Miapil siya sa ICC Trial Division niadtong Marso 2021 ug magpabilin didto hangtod sa 2030. Sa wala pa moapil sa ICC, nagserbisyo siya isip huwes sa Crown Court sa England ug Wales, diin iyang gidumala ang mga kasong kriminal sama sa pagpatay ug pagpanglimbong.
Nagserbisyo usab siya isip senior prosecutor sa International Criminal Tribunal para sa kanhing Yugoslavia. Niadtong 2004, gihatagan siya sa Companion of the Order of St. Michael and St. George (CMG) isip pag-ila sa iyang mga serbisyo sa internasyonal nga balaod.
Ang pagporma sa Trial Chamber III ug ang pagtudlo sa usa ka presiding judge giisip nga importanteng mga lakang sa pagpadayon sa kaso batok kang Duterte ubos sa mga proseso sa ICC.
