General Santos City | Hugot ang pasalamat sa CEO/Presidente sa Bombo Radyo Philippines ngadto sa mga katawhan dili lamang dinhi sa nasod kun dili lakip na sa tibuok kalibutan sa kanunay nga pagsalig sa sibyahanan sa Bombo Radyo.
Atol sa ika- 56 nga anibersaryo sa Bombo Radyo gipasalamatan sa CEO og Presidente sa network nga si Ms. Margaret Ruth C. Florete ang walay puas nga suporta sa mga katawhan bisan pa man sa pipila na ka mga katuigan nga nahimong tinubdan sa mga impormasyon ang Bombo Radyo Philippines. Dugang pa niini nga talagsaon ang nahimong papel sa Bombo Radyo ning tuiga inubanan sa panalangin sa Founder nga si Don Marcelino Florente kaniadtong 1996 nga gi-pasa ngadto kang Dr. Rogelio M. Florete. Samtang pinaagi sa kasamtangang liderato ilawom ni Dr. Rogelio M. Florete, mas milapad pa ang mga estasyon sa Bombo Radyo nga aduna nay 31 ka mga AM og FM Stations nga lig-ong nag-operate sa nagkadaiyang bahin sa nasud.
Nahimo usab nga nagmalampuson ang estasyon sa pipila ka mga katuigan luyo sa daghang mga kausaban sama sa digitalization, production restructuring, og global reach nga nahimong mas nakapalig-on sa Bombo Radyo. Sa ulahing bahin, gina-imbita sa CEO ang mga katawhan nga walay puas sa pagsalig sa Bombo Radyo alang sa tinuoray nga tinubdan sa impormasyon nga walay gidapigan, walay kahadlok nga mga komentaryo ug sa mga programa nga mag-edukar ug maglingaw sa mga katawhan samtang makigtambayayong sa mga local ug international correspondents sa tibuok kalibotan sa paghatud sa mga panghitabo matag adlaw.
