GENERAL SANTOS CITY – Gikalipay sa sibyahanan ilabina ni Bombo Jonathan ‘Bombo Janjan’ Macailing ang pagkabasura sa kasong online libel nga gipasang-at sa mga supporters ni Joel Apolinario, founder sa KAPA Community Ministry International.
Sa 10 ka panid nga kamanduan, gipadayag ni Deputy City Prosecutor nga si Paolo R. Aquino nga gibasura ang mga alegasyon nilang Jezrael Florinosos, Jenny B. Tiangga, Richard G. Varron, Jojo P. Tinguban ug Roger A. Camingawan.
Kini tungod wala direktang gitumbok kanila ang ginimong mga komentaryo ni Bombo Janjan inay sa kinatibuk-an batok sa KAPA.
Nasayran nga lima ka kaso sa online libel ang gi-dismiss sa prosekyuson human desisyunan kini sa korte.
Ang naasoy’ng mga kaso ang may kalabotan sa mga pagpangomentaryo ni Bombo Janjan batok sa pagpangilad sa KAPA sa mga miyembro niini luyo nga may gipagawas na nga permanent Cease and Desist Order (CDO) og gisundan pa sa pagka-revoke sa Securities and Exchange Commission (SEC) registration sa maong investment scam.
