GENERAL SANTOS CITY – Ugma na matigayon na ang labing giatangan nga Bombo Bancarera: Tuna Festival Edition Mindanao Circuit Championship Leg.
Usa kini sa tinuig nga aktibidad nga ginapahigayon sa Bombo Radyo, ug usa sa highlights sa Tuna Festival.
Ipahigayon kini sa Queen Tuna Park, Setyembre 5, adlaw’ng Miyerkules, kung asa giimbitahan ang tanang nakigduyog sa 20th Tuna Festival nga saksihan ang pinasahi ug kulbahinam nga lumba sa mga labing maayo ug hanas nga banca riders sa tibuok Mindanao, nga midaog sa unang upat ka hugna sa Bombo Bancarera 2018 Mindanao circuit leg, nga una nang natigayon sa Sarangani, Butuan, Davao, ug Cagayan de Oro.
Ug gani, sa karon, hugot na ang pagpangandam sa mga sumasalmot, aron dako ang tsansa nga makadaog ug mupatibabaw batok sa mga kaatbang nga bangka riders.
Kini gumikan dagkong kantidad sa premyo ang nagpaabot sa mga mudaog.
Ang magkampeon makadaog ug P100,000; ang 1st runner-up makadaog ug P50,000; ang 2nd runner-up makadaog ug P20,000; samtang ang mga non-winning participants makadawat gihapon ug tig-P1,000 nga consolation prize.
