Bayloanay og bihag sa Russia og Ukraine madayon karong semana

Padayon gihapon ang Ukraine sa ilang plano nga pagbaylo-anay sa mga bihag tali sa Russia.

Matod pa sa hepe sa Ukrainian military intelligence nga si Kyrylo Budanov, walay kamatuoran ang giingon sa Russia nga mihunong na sila sa kasabutan nga ipatuman matod pa sa umaabot nga mga adlaw.

Dugang pa niini, walay rason aron i-postpone ang pagbaylo sa ilang mga bihag nga sundalo nga naglangkob sa 6,000 ka tawo nga mga samdan ug masakiton.

Nagpadayag usab og kabalaka ang Russia bahin sa posibleng pagkansela sa ‘prisoners swap’ tungod sa mga ‘drone strike’ nga nahitabo sa duha ka nasod.

Kahinumduman nga adunay gikatakda nga negosasyon ang duha ka nasud, nga ginatabangan sa Estados Unidos, aron mahuman na ang kapin sa tulo ka tuig nga panagbangi.