GENERAL SANTOS CITY – Daku ang pagtuo sa kapulisan nga gihilabtan pa ang 7 anyos nga batang babaye ayha gipatay ug gisulod sa sako diin nakaplagan nga wala nay kinabuhi sa usa ka bakante nga luna sa Purok Malinawon, Barangay Conel ning syudad sa Gensan kaganihang buntag.
Matud kang Police Major Robert Fores, Hepe sa Police Station 9, naila ang biktima nga si Princess Arian Cabucos diin walay nay underwear samtang nakatuok sa iyahang liog ang sanina niini dihang nakaplagan.
Una nang nagpatabang kanila ang apohan sa biktima human nga nawala kini ug pipila na ka adlaw.
Apan nakadawat matud pa sila ug report kaganihang alas 11 pasado sa buntag nga adunay nakit-ang patay nga lawas sa bata nga gisulod sa sako hinungdan nga girespondehan kung asa nakumpirma nga mao kini ang nawala nga bata ng si Princess.
Sa karon sumala ni Fores aduna nay ginasundan nga person of interest ang kapulisan kansa usa dinhi ang amahan sa nahisgutang bata human nga nahimo na matud pa sa nahisgutan nga hilabtan ang biktima pipila na ka tuig ang milabay.
