Nakaangkon og gamay nga daot ang barko sa Bureau of Fisheries and Aquatic Resources nga nagpahigayon og routine maritime patrol duol sa Pag-asa Island human nga gibanggaan sa Chinese maritime militia (CMM) vessel.
Gikumpirma kini sa BFAR niadtong Martes, Oktubre 15.
Natigayon ang maong bag-ong engkwentro sa West Philippine Sea samtang paduol ang BRP Datu Cabaylo sa Pag-asa Cay 4, nga makita 5 nautical miles lamang gikan sa Pag-asa Island, banda alas 7:45 sa buntag niadtong Biyernes, Oktubre 11.
Sumala sa BFAR, nagpahigayon og delikadong maniobra ang barko sa Chinese maritime militia og gisulayan nga babagan ang ginaagian sa patrol boat sa Pilipinas nga misangko sa pagbangga sa starboard bow sa BRP Datu Cabaylo.
Nagresulta kini og pagkalumping sa starboard bow sa BFAR vessel apan napadayon gihapon niini kauban ang BRP Datu Sanday ang ilang misyon og luwas nga nakadunggo sa Pag-asa Sheltered Port.
Bisn sa bag-ong pagpanghasi sa Chinese vessel, gipanindugan sa BFAR nga padayon ang ilang pagpatrolya sa WPS.
