GENSAN- Takdang mopasaka og kaso sa korte ang hugpong sa Bantay Kuryente Movement batok sa Board of Directors sa Socoteco II, human kini mapakyas sa paghatag sa mga dokumento nga ilang gipangayo isip kabahin sa transparency ngadto sa Member Consumer Owners (MCOs).
Sumala kang Ed Cejar, chairman sa Bantay Kuryente Movement, dugay nang wala misanong ang mga nasangpit nga opisyal sa ilang mga hangyo.
Tungod niini, nakahukom ang grupo niadtong miaging adlaw nga magpadala og pinal nga pahibalo kabahin sa ilang gipangayo nga nag-ugat pa niadtong Enero pinaagi sa ilang petisyon, apan hangtod karon wala gihapoy tubag.
Kung mapakyas gihapon ang mga opisyal sa paghatag sa maong mga dokumento, nagpasabot lamang kini nga wala nila hatagi og bili ang interes sa mga Member Consumer Owners ug mao ni ang ilahang mahimong basehan sa ilang pagduso og mga kaso batok sa nasampit nga mga opisyal.
