GENERAL SANTOS CITY – Gidawat sa bag-ong lingkod karon nga labaw sa Police Regional Office (PRO) Region 12 nga mao si PBGen. Percival Augustus P. Placer ang hagit nga ipadayon ang nasugdan ni PBGen. Jimili Macaraeg subay sa ‘5 focused agenda’ ni PNP Chief PGen. Benjamin C. Acorda Jr.
Sa iyang mensahe, gisaad ni PBGen. Placer, nga iyang ipadayon ang mga maayong buhat sa iyang gihulipan nga si PBGen Macaraeg ingon man sa ilang buhing panumpaan sa katilingban alang sa kalinaw og kahapsay sa rehiyon.
Ang mga pulis sa PRO12 misaad usab sa ilang hingpit nga suporta ngadto sa PBGen Placer aron mapalambo pa ang ilang serbisyo sa mga lungsuranon sa Rehiyon Dose.
Kahibaluan nga gipangunahan ni PLt. Gen. Michael John Dubria-Acting Deputy Chief PNP for Operations ang retirement honors alang kang Macaraeg ug ang turnover of command ceremony para kang Placer sa Camp General Paulino Santos, PRO 12 Grandstand, sa Tambler, General Santos City.
Si Placer, gagikan sa PNPA- Police National Police Academy (Tagapaglunsad Class of 1993).
Sa wala pa matudlo isip labaw sa PRO-12, si Placer nadestino sa PNP-Peace Process and Development Center (PPDC).
Samtang sa retirement speech ni Macaraeg, gipasalamatan niya ang kooperasyon sa tanan sa rehiyon dose nga bahin sa iyang 37 ka tuig nga pangatungdanan, kung asa na-highlight ang Bombo Radyo sa paghatod og mga balita ubos sa iyang liderato.
