GENERAL SANTOS CITY – Patay ang usa ka lalaki nga bag-uhay lamang nakagawas sa bilangguan human maka-piyansa, human gipusil sa riding-in-tandem.
Gibutyag sa Bombo Radyo ni Police Senior Insp. Lemuel Enrijo, deputy station commander sa San Isidro Police Station, natigayon ang insidente sa may Hangar, Brgy Mabuhay, samtang sakay sa taxi ang biktima nga giilang si Kimbo Sagalto, 33-anyos, nga giakusahan nga nangawat sa usa ka botika sa AOR sa Lagao Police Station.
Gikaingon nga human makapiyansa alas-3:45 sa hapon ug padulong na unta sa GenSan Airport ang biktima, aron mubiyahe pauli sa Baguio, dihang gipusil sa mga suspek.
Base usab sa pahayag sa driver sa taxi nga aduna matud pay usa ka puti nga kotse nga maoy unang miharang sa gisakyan nga taxi sa biktima, una kini gipusil sa riding-in-tandem.
Kahibaluan nga nakaangkon ang biktima ug mga samad-pinusilan sa tuo nga dughan, wala nga buktong ug apapangig, nga maoy hinungdan sa iyang hinanaling kamatayon.
Nasayran nga si Sagalto ika-unom nga biktima sa pagpamusil dinhi sa dakbayan alang ning tuiga.
