GENSAN- Gipahibalo ni Gensan City Vice Mayor Edmar Yumang, nga aprobahan na sa konseho ang bag-ong fare matrix alang sa tricycle nga nagbase sa paglihok sa presyo sa gasolina.
Matod niya, ‘cumulative’ ang sistema sa plete kung diin awtomatiko nga mag-adjust ang pamasahe depende sa presyo sa petrolyo, ug adunay klarong bracket para sa unang upat ka kilometro.
Gibutyag usab sa nasampit nga opisyal nga kung moabot og ₱90 ang gasolina, naa na dayon katugbang nga plete nga ipatuman, ug kon moubos ang presyo, mo-adjust usab ang singil.
Ang maong ordinansa ipasa sulod sa 10 ka adlaw ngadto sa ehekutibo aron pirmahan sa mayor.
Apan klaro nga dili pa kini epektibo dayon hangtod wala pa kini mapahibalo sa publiko. Sumala sa vice mayor, importante nga mahibalo ang katawhan tungod kay kini naglakip og direktang pagsingil sa serbisyo publiko.
