Gipahibalo ni Pastor Ralph Garay, Bombo International Correspondent sa USA, nga nahimong mabungahon ang panagkita ni Ukrainian President Volodymyr Zelensky ug US President Donald Trump sa White House diin nakab-ot ang ilang katuyoan nga mahitabo ang trilateral meeting uban ni Russian President Vladimir Putin.
Tumong sa maong panagtagbo mao ang pagpangita og paagi aron tapuson na ang gubat tali sa Russia ug Ukraine.
Matod pa ni Garay, nagsagol ang reaksyon sa international community bahin sa maong kalamboan, apan sa bahin sa mga European leaders, mas positibo ang ilang panan-aw ug naglaum nga maghatod kini og mas klaro nga direksyon para sa kalinaw.
Kini nga inisyatibo naghatag og excitement ug interes sa daghang sektor, ilabi na sa personal nga panagkita sa tulo ka lider, nilang Putin, Trump ug Zelensky, nga giila nga usa ka dakong lakang sa global nga diplomasiya.
Gipasabot usab ni Garay nga si Trump adunay klarong tumong nga tapuson ang gubat ug nagpaila usab kini sa iyang kaugalingon nga usa ka ‘great negotiator’ ug ‘peace maker’ sa kalibutan.
