Gibutyag sa Armed Forces of the Philippines (AFP) nga wala sila nabalaka sa desisyon sa Estados Unidos nga ibalhin ang pipila sa ilang military assets gikan sa South China Sea paingon sa Middle East, taliwala sa nagkasamot nga tensyon tali sa Israel ug Iran.
Sumala ni Rear Admiral Roy Vincent Trinidad, spokesperson sa Philippine Navy on West Philippine Sea (WPS), nga kaya sa AFP nga mubarog sa kaugalingon bisan pa og ang ilang dugay na nga treaty ally ang US nga nagtutok na karon sa krisis sa Middle East.
Gipasabot ni Trinidad nga ang Philippine Navy wala magpabilin sa usa lang ka lugar sa dagat nga nasakupan sa Pilipinas kay padayon kining nagapatrolya sa tibuok kapuloan.
Base sa report, niadtong Lunes, Hunyo 16, gibalhin ang US aircraft carrier USS Nimitz gikan sa South China Sea ngadto sa Middle East tungod sa nagpadayong tensyon sa Iran ug Israel, nga miresulta na sa pagkamatay sa pipila ka opisyal ug mga sibilyan.
Apan gibutyag ni Trinidad nga ang maong estratehiya usa ka natural nga lakang sa mga naval forces.
Apan sumala niini nga kini walay epekto sa maritime security sa West Philippine Sea.
Sa pagkakaron, padayon gihapon ang mga operasyon ug pagpahugot sa depensa sa AFP sa mga katubigan sa Pilipinas, subay sa ilang mandato sa pagpanalipod sa teritoryo ug katawhan sa nasud.
