Imbistigahan na sa Department of Justice (DOJ) ang notary public nga nagnotaryo sa counter-affidavit ni dismissed Bamban, Tarlac Mayor Alice Guo, luyo nga wala nanumpa personal sa atubangan sa abogado ang gipalagpot nga kanhi Mayor.
Matud pa ni Justice spokesperson Mico Clavano, himoan kini og aksyon sa DOJ ilabi na nga may kalabotan kini sa iyang notary authority, ug adunay posibilidad nga giabuso ang maong gahom.
Kahinumdoman nga sa Senate hearing niadtong Martes, Agosto 27, 2024, gikuwestiyon si Atty. Elmer Galicia sa iyang mga kasaypanan sa pagsunod sa mga pamaagi dihang iyang ginotaryohan ang counter-affidavit ni Guo sa iyang buhatan sa San Jose Del Monte, Bulacan.
Ginotaryohan ang maong dokumento niadtong Agosto 14, apan gikataho nga nakagawas na sa nasod si Guo sa maong adlaw.
Namatikdan sa mga senador nga ginotaryohan ni Galicia ang dokumento bisan og wala personal nga nanumpa si Guo sa iyang atubangan.
Kahibaloan nga sa pagkuha ug notaryo gikinahanglan nga i-presenta sa kliyente ang iyang kaugalingon.
