Gipahamtangan og lima ka adlaw nga pagdili sa protesta sa kapulisan sa Paris, France ang pipila ka lugar duol sa mga piniling eskwelahan ug unibersidad sa kaulohan, tungod sa nagpadayong dinagkong protesta sa nasud.
Gidili sa mga awtoridad ang pagpahigayon og mga rally sulod sa 100 meters nga palibot sa 10 ka secondary schools ug lima ka unibersidad gikan Nobyembre 16 hangtod Nobyembre 20.
Matud ni Paris Police Chief Patrice Faure, gikinahanglan ang maong lakang tungod kay ang mga protesta maoy hinungdan sa kagubot ug pagbabag sa mga dalan palibot sa mga eskwelahan, lakip na ang nagpadayong kapintasan.
Samtang, nakig-alayon ang walo ka mayor gikan sa nagkadaiyang distrito sa Paris ngadto sa regional education office aron mangayo og dugang seguridad alang sa mga eskwelahan nga gibabagan sa mga nagprotesta.
Niadtong Sabado, mikabat sa 106,000 ka mga tawo ang miapil sa protesta sa nagkadaiyang kadalanan sa France. Kini na ang ikalimang sunod-sunod nga Sabado nga gihimo ang dinagkong protesta sukad Oktubre, diin gipangayo sa mga katawhan ang mas maayong kalidad ug kondisyon sa edukasyon sa nasud.











