Giklaro sa aktres nga si Ellen Adarna nga wala sila nagbalik sa iyang kanhi kapikas nga si John Lloyd Cruz, ug mas komportable sila karon isip managhigala ug mga ginikanan nga nagtinabangay sa pagpadako sa ilang anak.
Mitumaw ang espekulasyon nga posibleng nagkabalik sila human gipakita ni Ellen ang iyang suporta sa bag-ong endorsement ni John Llyod kauban ang ilang anak nga si Elias alang sa usa ka brand sa tambal. Gi-repost usab niya ang maong advertisement sa iyang social media account.
Sa comment section, gitubag ni Ellen ang usa ka netizen nga nagtuo nga posibleng nahigugma na usab siya kang John Lloyd. Matud pa sa aktres, managhigala lamang sila ug nagtinabangay sa pag-atiman sa ilang anak, ug mas maayo alang kanila nga magpabilin sa maong kahimtang.
Samtang, gidayeg sa mga netizen ang maayong relasyon sa kanhi magkarelasyon tungod sa ilang kooperasyon sa pagpadako sa ilang walo ka tuig nga anak nga si Elias, bisan pa man nga dugay na silang nagbulag niadtong 2019.











