-- ADVERTISEMENT --

Naghatag og kinatibuk-ang ₱160,000 nga livelihood assistance ang Department of Social Welfare and Development o DSWD-12 ngadto sa walo ka pamilyang naapektuhan sa pagpamusil sa Banga National High School niadtong Septiyembre 18, 2026.

Nakadawat og tag-₱20,000 ang matag pamilya isip puhunan sa ilang panginabuhian sama sa sari-sari store, tilapia hatchery, pagbaligya og bulad, carinderia ug home baking.

Gipahigayon ang pag-apod-apod sa tabang niadtong Nobyembre 16, atol sa flag ceremony sa DSWD sa Barangay Zone III, Koronadal City.

Kabahin kini sa recovery assistance sa ahensya human unang gihatagan og psychosocial first aid ug trauma intervention ang mga estudyante, ginikanan ug mga pamilyang namatyan o adunay nasamdan sa maong pagpamusil.

Tumong sa programa nga matabangan ang mga naapektuhang pamilya nga makabangon sa ilang kahimtang ug makasugod pag-usab og panginabuhian.

-- ADVERTISEMENT --