Gipasaligan ni Davao del Sur Governor Yvonne Roña Cagas nga dili mahimong tagoanan o dangpanan sa mga pugante ang ilang probinsya, ilabina kang Senador Ronald “Bato” Dela Rosa nga padayon pang gipangita sa mga awtoridad.
Matod ni Department of Justice Secretary Fredderick Vida, mao kini ang direktang pasalig sa gobernador kaniya atol sa iyang bag-ohay lang nga pagbisita sa Mindanao.
Gipasabot ni Vida nga nahiuyon kini sa ilang panawagan nga dili mahimong “haven of fugitives” o tagoanan sa mga tawo nga giingong milikay sa balaod ang bisan unsang lugar.
Gipasalig usab sa gobernador nga dili sila mohatag og proteksyon aron itago ang senador. Dugang pa ni Vida, makasiguro siya nga wala sa Davao del Sur si Dela Rosa.
Samtang, padayon pang gipangita sa mga awtoridad ang senador ug adunay 50 milyon pesos nga ganti alang sa impormasyon nga mosangpot sa iyang pagkadakop.
Gawas niini, gi-isyu usab sa International Criminal Court ang warrant of arrest batok kaniya human siya ginganlan nga co-perpetrator ni kanhi Pangulong Rodrigo Duterte sa kaso nga crimes against humanity.
