Nag-atubang og grabeng krisis sa kuryente, tubig ug grabeng katugnaw ang milyon-milyong residente sa Kyiv ug uban pang bahin sa Ukraine human gipakusog sa Russia ang mga pag-atake batok sa mga pasilidad sa enerhiya sa nasud.
Usa sa mga naapektuhan niini si Daryna Kulchytska, usa ka single mother nga nagpuyo uban sa iyang duha ka anak sa ikapitong andana sa usa ka apartment sa Kyiv. Nakaeksperyensya sila og hangtod 20 ka oras nga pagkawala sa kuryente matag adlaw, hinungdan nga napugos silang antuson ang grabeng katugnaw ug kangitngit.
Matod sa mga report, hingpit nang naguba ug wala na sa operasyon ang usa sa pinakadakong power station sa Ukraine human maigo sa sunod-sunod nga kusog nga ballistic missiles. Padayon usab nga nalangan ang pag-ayo niini tungod sa kanunay nga pagpatingog sa air raid sirens ug hulga sa mga drone attack.
Gipasabot ni Maxim Timchenko, CEO sa DTEK, ang pinakadakong pribadong kompanya sa enerhiya sa Ukraine, nga doble ang kakusog ug kalapad sa mga pag-atake karong tuiga. Gilauman nga moabot pa sa sunod nga ting-init sa dili pa hingpit nga mapasig-uli ang operasyon sa naguba nga planta.
Bisan pa sa grabeng kahadlok, kalisod ug desisyon sa uban nga mobakwit na paingon sa laing nasud, nagpabilin nga lig-on ang baruganan ni Daryna ug sa daghang mga Ukrainiano. Mas pilion pa nilang magkinabuhi nga walay kuryente kaysa mapasakop sa Russia.
