Naghatag ang Department of Social Welfare and Development (DSWD) og tag P10,000 nga pinansyal nga ayuda ngadto sa 54 ka mga vendor ug indibidwal sa Pasay City nga temporaryong mawad-an og panginabuhian tungod sa pagsirado sa ilang mga puwesto isip pagpangandam sa 2026 ASEAN Summit.
Gipahigayon ang pagpanghatag sa ayuda karong Miyerkules, Nobyembre 11, sa Andres Bonifacio Elementary School. Gawas sa pinansyal nga tabang, nanghatag usab ang ahensya og Family Food Packs (FFPs) aron makatabang sa adlaw-adlaw nga panginahanglan sa mga apektadong pamilya.
Matud sa DSWD, magpadayon ang pagpanghatag sa cash assistance karong Nobyembre 12 ug 13 alang sa ubang mga vendor ug indibidwal nga maapektuhan usab sa temporaryong pagsira sa ilang mga negosyo ug puwesto.
