Usa ka Pinoy seafarer ang namatay human mobuto ang usa ka oil products tanker sa Persian Gulf niadtong Huwebes, Nobyembre 5, sumala sa Department of Migrant Workers o DMW.
Sakay sa MT Velos Sapphire, usa ka barkong nagpalupad sa bandera sa Marshall Islands, ang maong tripulante samtang nagbiyahe paingon unta sa Sitrah, Bahrain dihang nahitabo ang pagbuto. Gituohang posibleng drone attack ang hinungdan sa maong insidente, apan padayon pa kini nga gipamatud-an sa mga otoridad.
Gawas sa namatay, sakay usab sa barko ang laing 21 ka Pilipinong tripulante nga wala maangol sa insidente.
Nagpaabot og pakikiramay ang DMW sa pamilya sa namatay ug gipasaligan nga hatagan kini og gikinahanglang tabang ug giya.
Matod sa ahensiya, gipahibalo na sa licensed manning agency ang pamilya kalabot sa pagkamatay sa ilang minahal ug naghatag na usab kini og ayuda.
Gipasalig usab ni DMW Secretary Hans Leo J. Cacdac nga dili pasagdan sa gobyerno ang pamilya sa namatay nga Pinoy seafarer.
Padayon usab ang koordinasyon sa DMW sa tag-iya sa barko ug sa ubang otoridad aron masuta ang tinuod nga hinungdan sa pagbuto ug masiguro nga mahatag ang gikinahanglang suporta sa pamilya sa biktima.
HEADS:
