Gikumpirma sa Department of Migrant Workers (DMW) nga usa ka Filipino seafarer ang namatay samtang usa ang nasamdan human giatake ang barkong ilang gisakyan sa Persian Gulf.
Sumala kang DMW Secretary Hans Leo Cacdac, kabahin sa mga Pilipinong tripulante sa Marshall Islands-flagged tanker nga MT Velos Sapphire ang mga biktima.
Base sa inisyal nga imbestigasyon, naigo sa usa ka wala pa mailhing projectile ang barko nga maoy hinungdan sa pagkasunog niini niadtong Huwebes, pasado alas-1 sa kaadlawon.
Adunay 22 ka Pilipino nga sakay sa barko sa dihang nahitabo ang insidente, samtang paingon unta kini sa Bahrain.
Matod sa manager sa barko, posible nga usa ka matang sa missile ang miigo niini.
Padayon ang paghatag og tabang sa DMW sa mga nasamdan nga Pilipino.
Nakig-alayon na usab ang DMW sa manning agency sa barko aron masiguro ang luwas nga pagpauli sa mga naluwas nga Pilipinong tripulante.
