Misaka sa 7.8 percent ang ‘inflation rate’ sa nasud niadtong Oktubre gikan sa 7.2 percent niadtong Septyembre, base sa report sa Philippine Statistics Authority o PSA.
Kini na ang ikaduhang sunod nga bulan nga misaka ang inflation rate sa mga palaliton ug serbisyo sa nasud.
Tungod niini, miabot na sa 5.6 percent ang ‘average inflation’ rate gikan Enero hangtod Oktubre, nga milapas sa 2 hangtod 4 percent target sa gobyerno.
Giklaro ni PSA Chief ug National Statistician Claire Dennis Mapa nga ang sektor sa transportasyon ang nag-unang hinungdan sa pagsaka sa inflation human nakarekord kini og 20.1 percent nga inflation rate ug nakatampo og 62.9 percent sa kinatibuk-ang pagsaka niini.
Lakip sa mga hinungdan ang pagsaka sa plete sa mga jeepney ug bus, ingon man ang pagmahal sa gasolina, Liquefied Petroleum Gas o LPG, ug bayranan sa kuryente.
Apan, mas hinay ang pagsaka sa presyo sa mga pagkaon sa tibuok nasud sa maong panahon.
