Human sa 28 ka tuig nga paglakaw palibot sa kalibutan, nakabalik na sa ilang panimalay sa Britain niadtong Lunes ang 56-anyos nga si Karl Bushby, nga gikonsidera nga unang tawo nga nakahuman sa maong panaw pinaagi lamang sa paglakaw.
Si Bushby, usa ka kanhi paratrooper, nagsugod sa iyang panaw gikan sa habagatang bahin sa Chile niadtong Nobyembre 1998. Gilauman unta nga mahuman niya kini sulod sa 12 ka tuig pinaagi sa pagtabok sa America, Bering Strait, Russia ug Europe.
Mikabat sa 36,000 ka milya ang iyang gilakaw nga nagtabok sa upat ka kontinente ug 29 ka nasud.
Apan, pipila ka higayon nga nalangan ang iyang panaw tungod sa nagkadaiyang kalisdanan, lakip na ang pagdakop kaniya sa Russia tungod sa alegasyon nga espiya siya ug gihulga nga ipa-deport.
Nakasinati usab siya og engkwentro sa usa ka polar bear, gihulga gamit ang pusil ug napugos sa pag-ilis sa trolley nga gigamit sa pagdala sa iyang mga gamit human kini maguba.
Matud sa taho, gilakaw ni Bushby ang kataposang mga milya gikan sa Hull City Hall padulong sa balay sa iyang inahan, diin sila nagkita pag-usab sa unang higayon sulod sa 28 ka tuig.
Mitambong usab sa ilang panagkita ang German filmmaker nga si Werner Herzog nga nagplano sa paghimo og dokumentaryo mahitungod sa talagsaong panaw ni Bushby.
