Gipaniguro sa Samahan ng mga Magbabangus sa Pangasinan o SAMAPA nga magpabiling igo ang suplay sa bangus sa maong probinsya hangtod sa bulan sa Disyembre.
Matud ni SAMAPA President Christopher Aldo Sibayan, nagkantidad karon og P170 hangtod P180 ang matag kilo sa bangus, depende sa gidak-on, gibug-aton ug gidaghanon sa paliton.
Gipasabot sa opisyal nga mas ubos ang presyo sa bangus sa Manila tungod sa daghang ani gikan sa Bulacan ug Laguna, diin mas ubos ang gasto sa produksyon.
Gilauman usab nga magkaparehas ang presyo sa bangus sa dihang mahuman na ang panahon sa pag-ani sa ubang mga probinsya, samtang gamayng misaka ang panginahanglan niini atol sa kalag-kalag tungod sa pagdaghan sa mga bakasyonista.
Nagpadayon usab ang SAMAPA sa dinagkong pag-apod-apod sa bangus ngadto sa nagkalainlaing bahin sa nasud, lakip na sa Navotas, Malabon ug Cagayan Region.
Gibanabana nga katunga sa kinatibuk-ang ani sa bangus sa Pangasinan ang ipadala ngadto sa gawas sa probinsya, samtang ang nahibiling katunga igahin alang sa lokal nga merkado.
