Gipahimangnoan sa National Capital Region Police Office (NCRPO) ang publiko nga krimen ang pagpakaylap og bomb threat ug bisan ang pagbininuang bahin sa bomba o bomb joke atol sa pagsaulog sa Undas 2026.
Matud ni NCRPO Officer-in-Charge Brig. Gen. Christopher Abrahano, mahimong moatubang sa katugbang nga silot sa balaod ang bisan kinsa nga mohimo niini, ilabina human sa pipila ka insidente sa bomb threat sa Manila.
Gipasalig usab ni Abrahano nga andam ang kapulisan sa pag-imbestigar sa maong mga insidente ug pagdakop sa mga indibidwal nga responsable niini.
Samtang, nagpagawas usab og mga pahimangno ang Pasay City Police Station aron masiguro ang kaluwasan sa publiko atol sa Undas.
Gihangyo ang mga biyahero nga siguruhon ang kahimtang sa ilang mga balay sa dili pa mobiya, magmatngon sa ilang mga gamit bisan sa adlaw o gabii, ug ireport dayon sa mga otoridad ang bisan unsang kaduda-dudahang kalihokan.
